極推薦！！澳門手信必試英記餅家 迷你杏仁餅大有驚喜

自從港珠澳大橋開通咗，去澳門真係方便咗好多，之前通常都係搭船過去，而家可以搭車，帶埋小朋友同埋老人家成家去旅行就話咁易啦！淨係睇下大橋風景，再去澳門啲賭場玩下，瞓下啲又大又靚嘅酒店，兩日一夜真係唔錯嘅family trip，我同屋企人次次去澳門，除咗去賭場玩兩手、影下相之外，一定會周圍試下唔同嘅杏仁餅同豬肉乾，話曬都係澳門手信嘅首選嘛，唔買實比啲親朋戚友藐爆！！

今次行下行下，就去咗英記餅家試下佢嘅杏仁餅同蛋卷，估唔到好有驚喜喎！見到佢啲杏仁餅個包裝做得好靚、好有心思，最令我驚喜嘅係我見到佢啲杏仁餅有迷你版喎！我啲小朋友見到迷你杏仁餅即刻忍唔住叫我賣，啲迷你杏仁餅細細粒，好易入口，小朋友一啖一粒，唔會食到周地都係，諗起佢哋之前喺屋企食大塊嘅杏仁餅時，一啖咬落去啲餅碎跌到成地都係，搞到我掃地幾煩呀！見到佢地咁鐘意，我即刻叫佢地揀番兩盒，本來諗住杏仁餅都唔會好多味揀，咪叫小朋友自己揀囉！點知佢地一攞就攞咗四五盒，盒盒都唔同味喎，好似蛋黃、肉鬆、黑芝麻等等，最正嘅係竟然有海藻糖健怡杏仁餅，阿女仲話啱曬我食啦，唔使怕肥嘛！食完唔使有內疚感呢！我就話呢啲咁健康嘅食物，梗係攞嚟孝敬阿爸阿媽啦！

估唔到而家英記餅家做到咁多款式，唔怪得澳門手信可以歷久不衰！個個人嚟到澳門，都一定要買返一兩袋，之前買其他牌子嘅時候，如果買得幾袋冇返四五百蚊都落唔到樓，估唔到今次買咗成四五盒，都係二百零蚊，即係講緊三四十蚊一盒咋！話晒英記餅家咁老字號，估唔到啲價錢咁公道，其實諗諗下我細個嚟澳門，都已經聽過英記餅家個名，同啲店員傾偈先知道，原來英記餅家係澳門最老嘅餅家之一，已經九十幾年歷史，講真如果就咁睇佢包裝真係唔似啲老字號咁老土，好明顯落過心思執嗰啲包裝，攞嚟送禮絕對見得下人！

我哋最終買咗兩大袋，點知啲小朋友喺搭船已經食咗兩盒，仲嗌住唔夠喉，早知就買多幾盒啦，尤其係迷你杏仁餅一啖一粒，真係食下食下就成盒㗎啦！搞到我自己都試唔到幾種味道，下次再去澳門一定要再買先，攞嚟做澳門手信真係冇得輸，所以話可以迄立不倒嘅老字號，絕對有佢嘅實力喺度！